Ola! Eu son quen está á cabeza deste proxeto que naceu alá xa polo 2017 cando voltei de vivir uns anos en Londres onde aprendín o oficio. Chámome Vanesa Iglesias Casal e como vedes, o noso taller toma o nome do segundo apelido en honra a meu avó Adolfo; carpinteiro de infinita sabedoría no seu oficio e unha fonte inesgotable de coñecemento e aprendizaxe vital de onde aprender tódolos días.

Dende cativa, lémbrome xogar coa miña irmá no seu banco de carpinteiro que aínda conserva no baixo da casa. O olor da madeira, a cola, o pó das serras ao cortar, ...  son lembranzas entrañables que me ligan de maneira certeira co meu oficio actual. 

​

 Á súa vez son Historiadora da Arte pola Universidade de Santiago de Compostela (2005-2010) cun Máster e Arte Contempóranea, Museoloxía e Comisariado (2011) polo que bebo  sempre do que máis mamei na miña formación: beleza, artesanía e deseño.

Foi en Londres onde tiven a oportunidade de aprender enmarcación no Richmond Adult Community College ao oeste da cidade,  asqueada de traballos noxentos en grandes multinacionais. Logo de rematar a formación tuven a oportunidade de comezar como enmarcadora na  Jealous Gallery and Screenprinting Studio no seu departamento de enmarcación en Tottenham, nun polígono industrial onde vivín a dura realidade obreira da clase traballadora que acentuou a miña posición política e de compromiso máis se cabe. 

 

Dende o noso taller enmarcabamos para a propia galería sita en Shoreditch e Crouch End en outras arredor de toda a cidade  (Hung Up, Eyestorm) e para artistas moi recoñecidos na escea londiniense como Charming Baker,  Ben Eine ou Chris Levine. Así, tuven a ocasión de traballar con pezas de Banksky, Murakami, Tracy Emin ou Peter Blake en diversas ocasións.  E foi tamén como aprendín a traballar con calidade Conservación e as súas técnicas para a mellor preservacións das obras. 

​

Co tempo conseguimos este espazo de traballo no Campo da Feira na vila de A Estrada onde todas aquelas persoas boas e xenerosas sodes máis que benvidas e onde vos agardaremos cos brazos abertos. Tentaremos que sexa ademáis de lugar de traballo; de encontro, de conversas , de posta en común e casa de tódalas artistas galegas, onde tecer comunidade e futuro xuntas.

 

Amamos a nosa Lingua, a nosa Cultura e a nosa Terra, así como tódolos referentes artísticos e políticos que loitaron para facer valer a nosa cultura, arte e patrimonio polo que nos definimos como antifascistas e como tal combatimos o machismo, o racismo, o feixismo, a homofobia, os privilexios de clase e erguémonnos por un mundo máis xusto e igualitario para todas e todos . Somos orgullosamente clase obreira, traballadoras e galegas! 

​

​

​

​